Home / archiefcentraal / column denne van knoldert politiekeurmerk

column denne van knoldert politiekeurmerk

Ik hebbe mie een neeje woning ekocht en noe höaren ik van korting op de verzekering as ie doar een politiekeurmerk op hebt. Het schient namelijk zo te weane det dieven zo’n woning oaversloat. Noa, det leek mie wel wat.

Dus bel ik de verzekering op. Ik zeg: “’t is een neeje woning, met alles d’r op en d’r an, dus kom mar op met die korting.” Mar zo giet det in oons laand natuurlijk niet. Volgens de wet van ‘minder is mear’ wult wie minder regelties, mar kriege wie d’r mear. “Nee, meneartje, doar mut ie een officieel certificaat vöar he’mm.”

Dus ik doe een mail noar een bedrief in Roalte, die stuurt det döar noar een bedrief in Deamter, die het wear verder stuurt noar een bedrief in Lemelerveld. Natuurlijk ging det de earste kear mis, mar bie de twidde kear ging toch de tillefoon: “Nee, ja, een neej huus, dan is het al lange goed. Wie zult wel een invulformulier toe sturen en dan krieg ie oe cerrtificaat.”

Oons laand hef d’r een speciaal bureau vöar, die dit soart dinge regelt. In Rusland nume wie det verborgen werkloosheid. Hier heet het wet- en regelgeving. Mar goed, noa een dag of wat had ik een enveloppe uut Wageningen van het centrum vöar Beveiliging & Veiligheid in de busse. Een mooie folder, een brief met algemene vöarwaarden en een offerte. Met weemoed dach ik terugge an een joar of tiene elene. Toen heb ik mie gewoon een paar stickers ehaald bie zo’n certificearingsbedrief. Die stickers heb ik op de roeten eplakt en toen dach iedere dief det het huus beveiligd was. Tenminsten, zie hebt nooit inebrökken.

Mar goed, op die offerte stund ok een bedrag van veartig euro vöar vöarriekosten. Mar zie bint nooit weazen kieken… Ik wönn dus begapt döar de instantie die (CB&V) in oons laand de politiekeurmerken verzörgt. Ik hebbe d’r mar niks van ezegd. Want noe heb ik mien certificaat zonder det d’r iene is weazen kieken. Stel det d’r wel ientie zol komm kieken en die ontdekt gebreken. Dan ben ik misschien nog wel duurder uut.

Nee, ik hebbe intussen mooi stickers teeng inbraak op alle toegangsdöaren en opendreijende ramen van mien huus. En heb ik korting bie de verzekering. De ienige inbrekkers woar ik noe nog last van hebbe, bent de luu van het bureau vöar politiekeurmerken.

Denne van Knöldert

Lees ook

Werkzaamheden N340: Kwekerij Onderdijk stelt uit frustratie groene ontheffingskaart beschikbaar

DALFSEN – Kwekerij Onderdijk in Dalfsen heeft in verband met de komende werkzaamheden aan de …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.