Home / archiefcentraal / column denne van knoldert bel mie nie

column denne van knoldert bel mie nie

As ie nie wult det ze oe belt vöar een neeje verzekering, koopsom, hypotheek, goedkopere energie, nuum mar op, dan kun ie oe vanof heden anmelden bie ‘bel me niet’. Ik heb lange twiefeld vöar ik det deude. Want ik hebbe d’r ok altied nog wel schik in as ze mie belt.

“Ie wult mien va hemm? En ie wult ok iets verkopen? Dan weet ik nie zo zeker of ie mien va wult hemm, mar goed het is oe eigenste keuze”, höaren ik mien zunne lest zeng toen e wear zo’n irritante belsnol an de lijn had. En met een brede glimlach gaf e mie de tillefoon. Ik probear altied het gesprek zo snel meugelijk andersömme te dreien.

“U betrekt de stroom van Greenchoice? Dan kan ik oe noe een heel interessant anbod doene.”

“Van wie heb ie de stroom dan?”

“Det kan ik niet vertellen, menear!”

“Mar wrum mag ie mie wel vroang stellen en ik oe niet?”

“…”

“Nee, die invalshoek stiet niet op oe vroangliesie hè? Wat is noe de vollende vroage? Ophangen mag niet.”

“…”

“En dan nemt ze dit gesprek vermoedelijk ok nog op vöar leardoeleinden.”

“…”

“Kun ie as student – want det zul ie wel weane – gin better werk vinn dan as dit asociale gedoe?”

“Dag menear, bedankt vöar de andacht.”

En wear haa’n ze d’r een tevreden klant bie.

Zo wönn ik lest op ebeld döar iemand die mie koopsommen van de DSB wol anproaten. Ik hebbe het meanse van katoen egeem… AZ voetbalt d’r nóg slecht van.

Mar uuteindelijk heb ik mie dus toch via ‘bel me niet’-site of emeld vöar alle ongein. Naam, vöarletters, adres, tillefoonnummer, huusnummer, stroate, zie wult alles van oe weten. En toen ik op ‘akkoord’ drukken, zei de computer det ik een verkeerd tillefoonnummer had in etoetst. Ofwel: zie wussen alles van mie. En toen mos ik ok nog invullen op wulk vlak ik niet mear lastig evallen wulle wönn. Nou, op alle vlak natuurlijk, want as ik ergens een uutzundering make, weet ik wel zeker det ik gin ien oamd mear an warm etten toe komme. Want det is de tied det ze belt.

Het giet nog saai wönn in huize Knöldert, want spam meung ze binnenkort ok al niet mear versturen. Vöaruutlopend doarop krieg ik noe ollemoal mail van bedriem die mie vroagt of ik in het vervolg ók hun mails wulle ontvangen. Bedriem woar ik nog nooit mail van hadde…

Denne van Knöldert

Lees ook

Stekjesbeurs in centrum Lettele

LETTELE – Zij-actief houdt op zaterdag 2 oktober weer de jaarlijkse stekjesbeurs in het centrum …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.