Home / archiefcentraal / column denne van knoldert vrouwenvoetbal

column denne van knoldert vrouwenvoetbal

Vrouwen kunt twee dinge tegelieke, zegt ze altied. Ik stelle mie dan voär det ze jappel kunt kokken en ze tegelieke an kunt loaten branden. Of det ze met het zundagse röndtie fietsen ok tegelieke nog eam kunt opmerken det die iene opmerking van veertien dage terugge toch niet hillemoal in het goeie kealgat eschötten is. Met bosschoppen doene kunt ze zelfs dree dinge tegelieke. Bosschoppen halen, met de buurvrouw proaten en het gangpad verstoppen met hun winkelwaankie. En met seks, denk ik dan wel ‘ns, wat zollen ze d’r dan bie doene?

Ik hebbe zundag noar de halve finale van het vrouwenvoetbal ekeken. Doar kreeg ik niet de indruk det vrouwen d’r nog wel wat aans bie konn doene. Mie bekreup vöaral het gevuul det ze met íen ding tegelieke eigenlijk de haane al wel vol haa’n: voetballen. Det leek toch neans op? Lange halen noar vöaren. Wachten töt die Engelsen wear kwamen anvallen. En dan wear lange halen noar vöaren. D’r was d’r ok iene die een hakballegie probearen. Gelieke het hele grös kapot. Mar het hakballegie kwaamp niet oaver.

En dan die keeper. “Onhoaldbaar”, zei Jack van Gelder noa die blunder in de 116de minute. “Grabbelaar”, zol ik zengen. En ik denke det het een mooi moment was van twee dinge tegelieke doene. Die keepster was met de kop heel eans aans. En toen mos e ok nog keepen. Vrouwen kunt det, twee dinge tegelieke.

Mar ie mut vrouwenvoetbal niet vergelieken met mannenvoetbal, zegt ze dan. Nee, de’s mar goed ok, want het topniveau van vrouwenvoetbal is het niveau van B-voetballen bie de mannen. De B’s, die bent 15 töt 16 joar oald. En dan spölt ze niet teeng B1, mar teeng B2. Tja.

Nee, ie mag het niet met mannenvoetbal vergelieken. Mar wrum wult ze dan wél op tillevisie? Ömdet de mannen ok op tillevisie komt toch? En wrum wult ze dan een profstatus zodet ze noast het voetballen niet ok nog wat aans d’r bie hoeft te doene? Ömdet mannen d’r ok grof geld met verdient toch?

As die vrouwenvoetballers wél twee dinge tegelieke doane haa’n, zaten ze in de finale. Zie haa’n de scheidsrechter vöar rot mun schelden en smearige oavertredingen maken. De teengstander uut het ritme halen en de grensrechters intimidearen. Det haa’n ze d’r noast het voetballen ollemoal zat bie kunn doene. Dan hebbe wie het oaver het échte voetballen, det mooie spellegie met alles d’r op en d’r an. Vrouwenvoetbal hef nog een lange weg te goane.

Denne van Knöldert

Lees ook

Crossloop op de Lemelerberg

LEMELE – Op zaterdag 31 oktober vindt De Rikkert Finishing Lemelerbergloop plaats. Deze wedstrijd bestaat …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.