Home / archiefcentraal / column denne van knoldert postbus 51

column denne van knoldert postbus 51

Ik wolle Plasterk een vroage stellen. Dus ik noar de site van zien ministerie woar ik een mailadres vunne. Zes wekken later kreeg ik dit bericht:

“Wij verstrekken geen directe contactgegevens. Postbus 51 functioneert als een liaisonoffice tussen de burger en de ministeries. Het ministerie waarnaar u verwezen bent zal zelf contact met u opnemen.”

Vremd. Want ik had mien mail niet iens noar Postbus 51 estuurd. Ok vremd, ömdet Postbus 51 bliekbaar völle mear is dan ik altied dache. Noar mien mening was det de club van ‘blij dat ik rij’, ‘wie is de Bob’ en ‘Mijn baas maakt meer kapot dan drank goed kan maken’. Het vremdst is nog wel det ik van de bosschop niks snappe. Een liaisonoffice… Wat is det? En wrum gebruukt ze zulke woarden?

Eigenlijk is het ienige wat d’r normaal an is, det het ministerie nog steeds gin contact op hef enömm met mie. Want ik weet precies hoe det giet bie zo’n club. Iene van de ofdeling krig as opdracht de mails te beantwoarden. Iedere donderdagmiddag zet e zich d’r an. Woar e niet met oaver kump, schöf e döar. Niet noar vriedag, want dan hef e vrie. En op moandag begint d’r een neeje wekke. Nee, woar e niet met oaver kump, schöf e döar noar vollende wekke donderdagmiddag. Noa de lunch zet e zich achter de computer en probeart die middag de vroang zo völle meugelijk te beantwoarden. En woar e niet met oaver kump, schöf e döar…

Noa vier wekken kump zo’n ambtenaar d’r achter det e op disse maniere nooit zien werk ofkrig. Earste actie is dan een regel te bedenken oaver de snelheid van beantwoarden. Binnen zes of acht wekken is de standaard. Niet det ie dan het antwoard kriegt op oe vroage, bei-j gek. Ie kriegt allenig te höaren det oe vroage in behandeling is. Det is toch ok een antwoard?

Twidde actie is zo’n mail as die van mie de organisatie in sturen, woar een ander met het probleem van beantwoarden zit. En de derde actie is d’r iene bie in huren die oe met helpt op donderdagmiddag de vroang te beantwoarden. Mar zo wied is het dus nog niet, want ik wacht nog steeds op inhoudelijk antwoard.

Denne van Knöldert

Lees ook

Sportief en Gezond peiling in Raalte

RAALTE – De gemeente Raalte, GGD IJsselland en het Sportbedrijf Raalte vragen alle inwoners van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.