Home / archiefcentraal / column denne van knoldert gender

column denne van knoldert gender

Gender, det is gin plat woard. Gunder wel, det is van hier tot gunder. Mar gender, as ie het oaver gender hebt, dan heb ie het oaver de verschillende gedragingen tussen man en vrouw. Öm ingewikkeld te doene: Gender gedrag giet oaver sociale en culturele verschillen tussen de seksen.

Ik zie ule denken: “Van hier tot gender, Denne, woar nem ie oons disse wekke hillemoal met noar toe?” Nou, het zat zo. Wule – mien vrouw en ikke – haan van de wekke bezuuk met koffietied. Gezellig bezuuk, zo mar döar de wekke. Een angename man, een vöarnemstig type. Het was mie zo op het earste gezicht nog agis niet op evallen. Mar toen de koffie uutbleef kreeg ik het in de gaten. Die man en mien vrouw zaten honderd uut te proaten. Woaroaver? Nou, ik heb het eam an elusterd en eigenlijk preuten ze oaver niks. Ja, over het wear, oaver zwaluwen en oaver pinkkalveren. Tja.

En toen kreeg ik die vöarnemstigheid van die man in de smiezen. Ik geleuve niet det ze zulk soart dinge gender nuumt. Ikke nie teminsten, ik vun het mear een mooiproater. Mar goed, hij kwaamp vöar zaken, dus ik heule mie wat op de vlakte.

Gender taalgebruuk, ik hebbe d’r een kear een stuk oaver eleazen met betrekking töt sportjournalistiek. As op de tennisbane iemand zestien lentes pril is en op de schaatsbane iemand een robuuste ofzet hef, dan mag ule roane of d’r een man of een vrouw an het tennissen en an het schaatsen is. Verwar det niet met de cameraman van een voetbalwedstrijd die tussendöar ollemoal mooie vrouwen op de tribune close up in beeld nemt. Det is gewoon seksistisch.

Bie oons an de koffietoafel was gin koffie ekomm as ik het niet ezet had. Earlijk is earlijk, ik mosse vroang woar ik de suker mosse zuken – zo vake schenk ik de koffie dus niet – mar ík had de koffie ezet en in eschönken.

Toen het bezuuk weg ging leut ik ‘m uut. An de döare bedanken e mie nog eam vöar de zaken die wie edoane haan, en toen reup e nog ‘bedankt vöar de koffie’ de huuskamer in noar mien vrouw. En dèt is noe gender gedrag. Gemiddeld handelt de man de zaken of en dut de vrouw de koffie in. Bie het weggoan bedank ie de vrouw döarumme vöar de koffie, of e die noe in edoane hef of niet.

Denne van Knöldert

Lees ook

Open huis bij Pop Rock Factory

RAALTE – Pop Rock Factory houdt zaterdag 25 september een open huis. Tussen 14.00 en …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.