Home / archiefcentraal / column denne van knoldert gekonkel

column denne van knoldert gekonkel

Wielrennen is een katholieke sport, stund in Trouw bie anvang van de Vuelta in Assen. Noe is Trouw een protestantse kraante, dus dan heb ik altied iets argwaan. As het iene geleuf wat oaver het aandere geleuf zeg, dan is d’r altied stront an de knikker, hoe lief ze het ok verwoardt. Of better: hoe liever ze het verwoardt, hoe better ie op oe hoede mut weane.

De vredelievende geleuvigen bint vrogger nie vöar niks met roazende ruzie uut mekare goane. Zie geleum, zie wussen zeker te geleum, zie wussen zeker det zie het bie het rechte eind haa’n as het öm de uutleg van de woarden van Jezus op an kwaamp. Die aanderen, die haa’n d’r niks van begrepen.

Of zo as ze vrogger achter de toaren van de katholieke kerke oaver die ‘fienen’ zeien: van fiene reang wöj ok nat. Mar ja, achter die toaren zeijen ze ok altied det ie niet teeng de kerke mag pissen en toch is e gruun.

Wielrennen, een katholieke sport… Woar haalt ze bie Trouw de wiesheid vandan? Niet det wielrennen in Frankrijk, Italië en Spanje zo populair is. Nee, wielrennen is een sport woar ie kunt winnen zonder te winnen, bevobbeld döar een aander bewust te loaten winnen. Zo’n gebaar wördt allenig emaakt döar een held. Mar monn ridt te hele ploeg van de winnaar vöar de nummer twee van gisteren. En dan mut ie ziene wie d’r met de gele trui noar huus giet.

Wielrennen is ok een sport woar ie mag zondigen en dan noa de biecht wear volop mee mag doene. Pantani, dood egoane an doping, is een held in Italië. Drugsgebruker in de vrieje tied-Tom Boone, in België vindt ze het mooi. En wule? The Lord of the Rings Van Gelder drinkt privé gin bier mar nemt cocaïne en gin mens in dit land die het opnemt vöar ‘m.

Nederland is een oaverwegend protestants land. Det is bienoa hetzelfde as Calvinistisch. En det is wear recht in de lear, zakelijk, hooghartig zelfs. Met zo’n mentaliteit win ie allenig as ie écht de sterksten bent, as ie een aander niet neudig bint. Mar ben ie mear katholiek, dan kun ie ok nog wel ‘ns kear winnen met een bittie gekonkel hier en wat gedreij doar. Zo ongeveer zei Trouw het tenminsten. Ik zei al, ’t is een protestantse kraante.

Ik heb mie zelfs loaten vertellen det allenig de achterkaante van de katholiéke kerke gruun is…

Denne van Knöldert

Lees ook

Excursie bij het Rozendael

HEINO – Agnes Neimeijer verzorgt op dinsdag 22 juni weer een avondexcursie bij landgoed Het …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.