Home / archiefcentraal / column denne van knoldert blieb blieb

column denne van knoldert blieb blieb

Jonge jonge jonge, wat heb ik een klearehekel an die achtergrondgeluudties van de computer as de wichter d’r achter zit. Ik nemme mie iedere dag opnieuw vöar de temperatuur van mien bloed niet töt kokpunt te loaten oplopen, mar binnen het kwartier ontplof ik meestentieds. Zie zegt dat het ‘learen’ heet, mar dan doet ze det teengwoardig bliekbaar met de hele vriendenkring tegelieke.

Mut ze Engelse woorden learen bevobbeld, dan kriegt ze de woarden stuk vöar stuk op het beeldscherm. Hullie mut dan de vertaling intypen. Is het goed, zeg de computer blieb en kriegt ze het volgende woard. Is het fout, dan zeg de computer blieb blieb en dan kriegt ze ok het volgende woard. Een blieb blieb-woard kump noa het hele röndtie wear terugge. Net zo lange töt alle woardies bliem-wöardies ewönn bent. Dan denkt de wichter det ze Engels kent.

Mar toen ik doar een kear goed noar lusteren, höaren ik iniens ok een blieb blieb blieb vöarbiekomm. Niet ien, niet twee, mar drie kear. “Wat was det vöar wöardie?” wol ik weten. “O nee, det wat Rosalie.” En een twidde kear: “Ja, Jet had een vroage.” Klasgenoten, die vermoedelijk – of hoppelijk? – het zelfde huuswerk an het maken waren. Stiekem oaver de scholder met kieken of die tweegesprekkies met anderen of het inderdaad oaver het huuswerk giet, is d’r niet bie, want “pappa, wule hebt toch ok oonze privacy?” Van het onderdeel rechten en plichten, hebt ze de rechten altied het earste onder de knie.

En zo bliebt het d’r wat of bie oons in huus, ok al töt irritatie ömdet ík ok graag achter de computer had wullen zitten. Mar mien tied is verbannen noar de achteroamd. Teeng de tied det de tillevisieprogramma’s begint die ik graag wulle ziene, teeng die tied raakt de computer vrie en kan ik d’r achter.

Kreeg ik van de wekke een mailtie van mien blieb-dochter woarin ze mie verwees noar een liedtie op YouTube. Nou, det vinn ik altied hartstikke leuk, want ik magge graag de muziek van de jeugd lusteren. Öm op de hoogte te bliem, want mien muziekkennis giet töt zo ongeveer Herman Brood en Fischer Z, toen ben ik of ehaakt.

Met een soart van gretigheid surfen ik noar YouTube, toch al een medium woar ik niet te völle met doe. Ok det is namelijk een wereld die mie grotendeels vöarbie giet. Ik klik het liedtie an en wat dach ie? Hef iemand een nummer componeart det allenig mar uut bliebies bestiet. Öm gek van de wönn.

Lees ook

Schuur aan Haarweg in Lemelerveld afgebrand

LEMELERVELD – Vanmiddag heeft een grote brand gewoed in een schuur aan de Haarweg in …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.