Home / archiefcentraal / column denne van knoldert pietluttig

column denne van knoldert pietluttig

As ik het gastenboek in oons luxe ressort bie St. Raphael leaze, dan zit ik noe vakantie te vieren in een appartement woar gin moer van klopt, of al oonze vöargangers bint pietluttige donders die niks ewend bint. Leas met.

17 juli: “Let op, de wc-pot is te klein en hangt te lage. Ie mut iniens goed goan zitten want ie kunt mar mulijk in de biene komm öm eam iets noar links of noar rechts te schoem.” Het was mie nog niet op evallen, mar ik bedache mie iniens wel wie d’r ollemoal nog mear met zien blote konte op die brille ezetten had…

24 juli: “As ie koffie wult opschenken, mut ie het water op de gok kokken. Want hoe luxe dit huus ok is, de eigenaar had bliekbaar gin geld mear vöar een fluitkettel. Ik heb ontdekt det het water het best kokt as het begint te bubbelen in het stelpannegie. Het deksel van de kleinste panne past ok op het stelpannegie.” Denk noe nie det ik ule in de maling nemme, het stund d’r echt. Gekker nog, d’r achter stund: “Oaver het gebrek van de fluitkettel dient wule een klacht in bie de Geschillencommissie Reizen. Wule wult een deel van de reissom terugge.”

Zoaterdag is wisseldag in oons appartement en bliekbaar vult de luu de oamd van de vöaren het gastenboek nog eam in.

31 juli: “De koelkaste is wat klein. D’r past wel genog in, mar de ruumte vöar waterflessen is net te lage. Ie kunt döarumme het beste water kopen bie de twidde supermarkt op de rotonde. Doar hebt ze iets kleinere flessen.” Hmmm, water drink ik altied uut de krane. En op een terras serveart ze oe det ok (en ie beteaalt vöar water uut een flessie). Mar ik heb disse klacht toch eam verhölpen, döar het flessenrekkie in de döare een gaatie lager op te hangen.

7 augustus (oonze vöargangers): “As ule het nieuws op tillevisie wult ziene, kun ie het beste öm 18.30 uur op kanaal drie kieken, öm 19.00 uur op kanaal 6 en öm 20.00 uur op kanaal 1. Ie hebt dan het neejs uut disse regio, wereldneejs en neejs uut Nederland ehad. En De Telegraaf verkoopt ze ok bie de bakker op de hoek bie de uutgang van het ressort.”

Tja, ie kunt d’r feitelijk mar ien conclusie uut trekken. Op vakantie goane is behoarlijk ofziene. Eigenlijk kun ie mar better gewoon werken.

Denne van Knöldert

Lees ook

Jaarverslag: SallandWonen tevreden, maar ook zorgen over financiën

RAALTE – Corona of niet, SallandWonen heeft de belangrijkste projecten die gepland stonden voor het …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.