Home / archiefcentraal / column denne van knoldert naaktstrand

column denne van knoldert naaktstrand

“Vöar naaktrecreatie kun ie het beste van Frejus richting Nice riene en dan het derde strandje pakken. Bie het twidde trappie noar benenden, heb ie links achter de rots een naaktstrand. Naaktstrandje, want groot is het niet”, las ik in het gastenboek.

Noe ben ik niet zo van ‘ik mut en zal naakt recreëaren’ mar as ik d’r per ongeluk midden tussen terechte komme heb ik d’r ok nog wear gin bezwoar teeng. Dus hebbe wie gisteren ‘ns achter det rotsblok links van het twidde trappie op het derde strand ekeken.

Ik kan ule verklappen det de luu die naakt recreëart net niet de luu bint woarvan ie denkt ‘noa, doar wol ik wel ‘ns een middag naakt tussen ling te zunnen’. Het zal iets met schaamte te maken hemm. As ie oaver de schaamte hen bent van een zwembroek of een bikini uuttrekken midden op het strand, dan heb ie bliekbaar nog een heleboel schaamtes mear oaverwunn. Het was op det stand een aneenrijging van hangborsten en bierboeken. Eigenlijk hing alles wat mar zo’n bittie kon hangen. Töt an de billen van… van eigenlijk iederiene.

En as of det ollemoal nog niet erg genog was, haan ze d’r ok nog een volleybalveld stoane. Ik denk, zie goat mie hier toch niet ok nog een pöttie volleyballen? Mar ik het had het nog niet edacht of hup, doar kwaamp een balle uut een strandtasse en vöar ik d’r erg in hadde was het vijf teeng vijf op det mulle zandstrand. Gemengd volleyballen, ik heb het zelf ok wel edoane. Vanwege het net er tussen is het niet erg as ie gin clubtenue hebt. Iederiene trekt an wat boam op de stapel sportkleare in de kaste lag. Mar híllemoal gin tenue? Ik dach det ik een vriedenker wasse. Aanderen denkt nog völle vriejer, bleek mie gistermiddag.

Het hef iets met het verschil tussen geest en lichaam te maken, heb ik mie uut loaten leng. Het giet öm een vrieje geest, het maakt niet uut in wat vöar lichaam det zit. Een vrie lichaam – een naakt lichaam dus – helpt de geest vrie te maken. Want as ie oe nie mear hoeft te bekommeren oaver oe lichaam, heb ie tied oaver öm oe te bekommeren oaver oe geest.

Ik vinn het mooi ollemoal, mar vandage goa ik toch wear noar een gewoon strand. De badkleding die ze doar draagt, kump mie op de ien of aandere maniere völle naakter oaver.

Denne van Knöldert

Lees ook

Vriendenkring van de Hartkamp viert 40-jarig bestaan

‘Het doel is exact hetzelfde gebleven: ‘Het leven voor de bewoners zo aangenaam mogelijk maken’ …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.