Home / archiefcentraal / column denne van knoldert jakkeren

column denne van knoldert jakkeren

Vöar de terugreis van Zuud Frankriek noar Salland heb ik mie zelf een dag egeem, det wul zeng, gin 24 uur, mar gewoon teeng ettenstied thuus. Ik hebbe mien gedachten de leste dage al een paar kear oaver de terugweg loaten goane. En het gastenboek hef ok wel goeie tips.

Van St. Raphael of, zol ik de Alpen döar kunn crossen en dan via Zwitserland noar huus. Earst noar Marseille is ömme en gif oaveral tolweg, mar ie hebt dan wel töt an Deamter snelweg. In het gastenboek geeft ze de tip van Marseille met. “Kost een paar cent mear, mar och…” En: “Lyon is een mooie stad vöar een oavernachtingstussenstop.” Lyon? Doar wol ik al vöar de ochtendsspit döarhen weane. Det lig toch heel zudelijk? Dus met de ANWB-kaarte d’r bie nog mar ‘ns wear het hele verhaal döarnemm. Marseille, Lyon, Dyon, Nancy, Metz, Luxemburg… Het rietie is al 25 joar hetzelfde. En de steden zult straks de terugweg ok wel wear völle verder uut mekare ling as alle aandere joaren.

Mar Lyon as earste oavernachting? De’s 450 kilometer wiederop, vanof St. Raphael. Dus as ik een bittie döarkachel mut ik öm 04.00 uur in de auto zitten, dan binne wie öm 07.00 uur op die achtbaansrondweg van Lyon, net vöar de ochtendspits. Rest oons nog slechts 900 kilometer noar Salland. De rekkenmachine in mien heufd giet dan op volle toeren verder. 07.00 uur Lyon, Noa 800 kilometer tanken. Alles valt mooi saam. Want ik hebbe dan öm 09.00 uur de tanke löag. Dan is het ok tied vöar kofie. En de rest van de familie wördt dan ok zo toevandan wakker. Wie bint dan zo’n eind op streek, dette wie in principe doarnoa aajt vedan noar huus kunt.

In het gastenboek voeg ik döarömme toe: “Lyon kan een mooie oavernachtingsplekke weane, wie zaten d’r eigenlijk mear an te denken öm kort boam Nancy de earste koffiepauze te hoalen. ‘Koffiepauze’, ömdet det öm 09.00 uur ’s monns zo heet. Mar het wördt natuurlijk gewoon water, misschien ranja, met stokbrood dette wie een kear döar de roomkaas haalt vöar beleg.”

“Mar ie hebt toch vakantie?” vroagt de collega’s dan altied as ik op de earste dage van mien werk vertelle hoe ik noar huus rieje. En as ik dan uutlegge det d’r niks mooiers is dan met 150 oaver die Franse tolweang te roazen, dan kiekt ze mie an asof ik de Mexicaanse griep hebbe.

Wat ze niet weet is det ik een verbörgen agenda hebbe. As ik rond 17.30 uur in Salland benne, kunne wie met het gezin anschoem bie de oale luu vöar het warme etten. Sallandse jappel, Sallandse beunties. Sallandse worst. Doar wul ik noa dree wekke Frankriek wel een dag lang vöar oaver de Europese snelweang jakkeren.

Denne van Knöldert

Lees ook

Open huis bij Pop Rock Factory

RAALTE – Pop Rock Factory houdt zaterdag 25 september een open huis. Tussen 14.00 en …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.