Home / archiefcentraal / column denne van knoldert achterwerk

column denne van knoldert achterwerk

Ik zitte in de leste wekke van mien verdiende vakantie. In het hoger onderwies woar ik lesse geve begint ze namelijk volgende wekke pas. En angezien wule 41 uur in de wekke dreijt, valt de vakanties wat langer uut. Want zie zegt dan wel det het onderwies het mar luxe hef qua werktieden, denk d’r dan nog mar ‘ns vief uur bie oe 36-urige werkwekke op.

Hoe dan ok, de leste dagen van de vakantie vier ik altied rondom het huus. En soms gedraag ik mie dan in mien eigenste Salland as een toerist. Zo kwam ik lest langs een dreugmölle met wel vieftien van die heel grote onderbroeken d’r an. Op vakantie zol ik doar een foto van maken. ‘Muj toch kieken hoe ze doar de wasse ophangt’ zol ik dan in het onderschrift d’r bie zetten.

Gek is det, op oe eigen geboartegrond is de reactie d’r völle mear iene van ‘det doede wie toch niet?’ Net as op zundagmonn vrog niet met de bladbloazer an de slag goan, hang ie de wasse ok niet op met vieftien heel grote onderbroeken an de butenste wasliendroad. Niet op zundag, niet op willekeurig welke dag van de wekke nie.

Zelf hang ik de onderbroeken altied midden in, met an de butenkaante een paar grote handdoeken of bevobbeld dekbedhoezen. Kan mooi niemand ziene öm wat vöar onderbroeken het giet. Det is disse dage wel hillemoal van belang, want ik had op vaderdag neeje onderbroeken verwacht, mar det is mis egoane. En ik was d’r nog zo an toe. Ik denk det ik met Stöppelhaene nog wel eam bie de Hema noar binnen wippe, want doarnoa begint de sport ok wear.

Mar goed, die wasliene met al die onderbroeken. Heel grote onderbroeken. Vieftien stuks. Ollemoal hetzelfde. Het heuld mien gedachten vaste toen ik d’r langs kwaamp. Op de autoradio was een mooi liedtie woar ik de tekst nog ‘ns goed van wolle lusteren. Mar noar ien regel waren mien gedachten al wear bie die wasliene. Wie zol zien ‘lingerie’ zo in het zicht hangen? Mar het roadsel giet ok een aandere kaante op. As d’r vieftien dezelfde onderbroeken an de liene hangt, zol de bewoonster van het huus dan mar iens in de vieftien dage wassen? En zol e wel iedere dag een schone onderbroek antrekken? En het huus woar die luu woont, zol det ok een name hemm? Ik stel ‘Villa Achterwerk’ vöar.

Denne van Knöldert

Lees ook

Verharde paden in heemtuin

WIJHE – Heemtuin Veermans Hof IJsselflora in Wijhe heeft de paden in de tuin kunnen …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.