Home / archiefcentraal / column denne van knoldert luxe

column denne van knoldert luxe

Tis een hele oavergang van oons Alpenverblief noar de Cote d’Azur. Vöar de pries van dree wekken in de Alpen, meung wie de haane dichte kniepen dette wie hier zes dage op een luxe appartementencomplex zit, op vief minuten van het strand of. Tjonge jonge wat een weelde. Ik zag het metiene an de vergulde döarknoppen, mar kreeg d’r ok vat op toen ik het gastenboek vergeleek met een restaurantenbrochure. De duurste restaurants bliekt in det gastenboek het beste. Mar wule zult d’r wel nooit komm.

“Echt een anroader”, leas ik in het gastenboek. In de brochure leas ik de biebehöarende priezen. Wie betaalt uut ettend met zien vieren döargoans net zo völle as doar de man. Dus zie zult oons d’r niet ziene. Nee, ik pak het aans an. Ik schöppe de boel een bittie in de warre, döar in het gastenboek restaurants an te bevelen die niet in de brochure stoat, mar die vermoedelijk ok niet as ‘echt een anroader’ de wereld in zult goane vöar de luu die noa oons het huussie huurt. Want dette wie hier boam oonze stand zit, det kon ie bie ankomst an de parkearplaatse al wel ziene. Oonze Zafira stekt flink of teeng de Lexus van de buurman an de iene kaante en de Mercedus van de buurman ter andere zijde.

En ik ben niet de ienegen die het standverschil opmerkt. Menear die bie het vöarstellen met gif det hij een appartement in hartje Parijs hef, zut bie het uutpakken het verschil ok. Woar hij vermoedelijk gold gerande koffers op wielegies gebruukt vöar zien garderobe, heb ik mien kleare in een bananendeuze van de supermarkt zitten, want det pakt zo lekker in. En het kan weaene det ik mie vergisse, mar volgens mie wördt zien vrouw (twidde huwelijk, jong kippetie, borstimplantaten) wat wit öm de neuze (kan ok van Parijs komm) as ik met mien racefietse de lift instappe öm ‘m met noar binnen te nemmen. Doar fietsen ik vöarige wekke toevallig nog wel de Alpe d’Ueze met op, mevrouwtje.

“Nog nooit zo lekker pizza egetten” schrief ik in het gastenboek bie de name van een tweederangs restaurant net buten de centrumrand van Frejus. En “As ie hier niet egetten hebt, ben ie niet in St. Raphael ewest” geef ik de plaatselijke imitatie van een McDonald’s mee. Oonze opvolgers zult vremd opkieken as ze – vermoedelijk in gala – de veredelde snackbar binnen wandelt. Mar ik denke det ze van de snackbar ok wel eam achter de oaren krabt as ze ‘hoog bezuuk’ kriegt.

Denne van Knöldert

Lees ook

Kerstwinkelen bij Groenrijk Raalte

RAALTE – Zondag 8 december staat Groenrijk Raalte tussen 13.00 en 17.00 uur volledig in …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.