Home / archiefcentraal / column denne van knoldert gin haand

column denne van knoldert gin haand

“Ik geef ule mar gin haand”, zeg zo’n opgestökken nest met een westers accent teeng mie en de vrouw, asse wie noa een lange wandeling döar de bergen wear terugge bint bie oons huussie. Óons huusie. Nog wel. Töt oavermonn. En mevrouw doar, die oons gin hand wul geem, is de volgende eigenaar. Zie was op de gok twee dage earder ekomm en dach det e zo in het appartement kon. “Want ik kom hier ieder joar.”

As of ‘ieder joar komm’ mear rechten geef. Ik zegge: “Ok al komm ie hier dree kear per joar. As ie mie gin haand wult geem, bin ie niet mien gast en stoa ie toevallig wel in míen tuin. Dus as ie zo vriendelijk wult weane?” En netties heult ik het hekwerk vöar het meanse open. “Menear, denk toch an oe hartslag”, wol e mie wat kalmearen. Mar ik wasse de kalmte zelve. En det heb ik höar ok uutelegd. “Ik denk an mien hartslag mevrouw, en döarömme stuur ik oe hier weg.”

Verbouwereard leup ze langs mie hen de steile weg van het alpendörpie op. D’r kwaamp net een auto an. Zie sprung op ziet in de berm en verzwikken de enkel. Mar zie wol gin woard hemm. Asof d’r niks geböard was, kröppelen e noar het hotellegie iets wieder op.

’s Oams heb ik höar toch nog hartelijk welkom eheten in het gastenboek. “De waterkrane druppelen wat. Det hebbe wie van de wekke op elost döar een baco te gebruken. Mar noe is eigenlijk de hele geiser kapot. Ik denke det d’r een neeje geiser in mut vöardet ie an warm water kunt komm. Mar ja, douchen zul ie toch wel niet doene. Het puttie is verstopt dus löpp het water zo de gang in as ie nog mar anderhalve minute onder de sproeier stoat. Zo lange hoal ie det gelukkig niet vol met det koale water.”

Ik heb haar ok de mooiste weg de bergen in ewezen. Niet de echt mooiste weg, mar langs die valse herdershond van het derde huus in het dorp. Det zal ‘t meanse learen.

O ja, nog ien tip in het gastenboek van bewoners die d’r vöar oons in zaten, die heb ik verwijderd uut het boek. Het was een tip det ie de stofzuger vöar gebruuk goed mossen controlearen op of het deksel d’r wel goed op zat. “Want die wul nog wel ‘ns löss schieten. En dan ploft alle stof uut de zak zo de kamer in.” Ik dach det ze doar vanzelf ok wel achter zol komm.

Denne van Knöldert

Lees ook

Filmhuis Olst sluit seizoen af met The Grinch en Green Book

OLST – Het seizoen van Filmhuis Olst wordt op vrijdag 20 december afgesloten met The …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.