Home / archiefcentraal / denne van knoldert reageert op albert heijn

denne van knoldert reageert op albert heijn

Albert Heijn doet in een brief aan Ten Seldam uit Wesepe uit de voeten waarom ze een bonuskaart hebben ingevoerd. Dit als reactie op een column van Denne van Knöldert in het Weekblad voor Salland. Knöldert schrijft terug.

Beste Albert Heijn,

Dank vöar oe uutienzetting oaver het invoeren van de bonuspas. Mar ik binne d’r niet tevreane met. Ie denkt natuurlijk: die domme luu uut het oosten, die bluf ik wel of met een briefie en dan is het ollemoal wear goed. Niks d’r van. Noar mien bescheiden mening graaf ie oe eigenste graf in oe antwoard.

Ie begint oe brief met det ule in 1997 bent begunn met een neeje maniere van korting geem an de klanten. Een leugen, menear Heijn. Ule geeft korting an een selecte groep klanten. An de luu die hun ziel en zaligheid an oe bekend wult maken. En niet an de aanderen. Ik hebbe gin bonuspas, ik ben wél klant, ik kriege gín korting.

Ie hebt de bonuspas in’evoerd öm de klanten better te learen kennen. Precies. Det is ok mien stelling. Ie wult weten wie ik binne, woar ik mien geld an uut geve, wannear ik joarig binne, hoevölle wichter ik hebbe, wat die op hun brood et. En zo voart. De relatie tussen oe en mie wördt dan intensiever, schrief ie. Gelul. Ie kriegt doarmet de kans mie nog mear uut te kleden. Ié bepaalt de relatie. Ikke niet. Want as ik de koffie in de reclame wulle hmm, geböart det niet. Det geböart allenig as íe det wult.

Ie zegt det de klant profiteart van de anbiedingen. Nogmaals, det geldt allenig vöar de dommeriken onder ons die op hun pincode noa alles an oe verteld hebt. En doarbie: zie profiteart niet, zie wördt mear en mear ‘enekt. Ie zegt det zelf ok: ”wij kunnen onze aanbiedingen nog beter afstemmen op de wensen van de klant. […] Welke groep klanten is geïnteresseerd in dat ene artikel en waarom. […] Het gaat ons erom dat wij profielen kunnen maken van groepen klanten.

De gegevens bent bie oe in veilige handen, zeg ie. Menear Heijn, mut ie ‘ns googlen op Ahold en Fraude. Det wekt gin vertrouwen. En hoe zat det ok al wear met van Van der Hoeven? Is die niet gewoon veroardeeld ömdet e de boel bedonderd had? Ja nee, wie geleuft oe op oe woard, die persoonsgegevens, die bent bie oe nog ’ns in veilige haane.

Met vriendelijke groeten,

Denne van Knöldert

Lees ook

Natuurmomenten: Het verborgen meer

Sjaak Bruggeman deelt met enige regelmaat zijn natuurmomenten met ons. En altijd is er wel …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.